Er þetta ekki bannað?

Sagði eldri dóttur mín undir lok keppninnar þegar hún horfði og hélt um andlitið því hún hélt að kórónan myndi detta af ný kjörinni ungfrú Reykjavík.  "Er þetta ekki bannað" og ég spurði hvað, er hvað ekki bannað?  Nú að ganga með svona flotta kórónu sem gæti dottið?  Eina svarið mitt var, jú líklega en vonandi dettur hún ekki.

Til hamingju með titilinn ungfrú Reykjavík og vonandi bragðast pizzan vel...

Valin ungfrú Reykjavík

Músapels

Pels er í raun það eina sem mér dettur í hug þegar menn auglýsa eftir 3.200 músum, ekki að ég viti neitt um það hve margar mýs þarf til að búa til pels.  Varla ætla þeir að þjálfa þær til þess að leita af fíkniefnum?

3.200 hvítar mýs

Góður og menningarlegur sunnudagur en léleg þjónusta

Dagurinn í dag hefur verið sannkallaður fjölskyldudagur, eftir útréttingar og blómakaup í morgun héldum við fjölskyldan á vit menningar og lista hér í borginni.  Lá leiðin í Listasafn Reykjavíkur og Listasafn Ísland með viðkomu í Ráðhúsinu og að sjálfssögðu var komið við á tjarnarbakkanum svo sú stutta gæti nú heilsað uppá kvakandi liðið þar.

Í Listasafni Reykjavíkur sáum við áhugaverða sýningu eftir Steingrím Eyfjörð sem bar nafnið Lóan er kominn.  Sýningin samanstendur af fjórtán áhugaverðum verkum þó svo vissulega sum þeirra hafi hrifið okkur meira en önnur.  Einnig var spennandi sýning með verkum eftir Erró sem sérstaklega eldri dóttirin var hrifinn af enda litadýrðin mikil.

 

Í Listasafni Íslands sáum við sýninguna Streymið - La Durée en þar eru sýnd  verk þriggja myndlistamanna,  þeirra Guðnýjar Rósu Ingimarsdóttur, Gabríelu Friðriksdóttur og Emmanuelle Antille.  Þessi sýning höfðar kannski ekki til allra en flestir ættu að geta fundið eitthvað við sitt hæfi.

Eftir langa sunnudagsgöngu bæði innanhús í listasöfnunum sem og utanhús í miðborg borgarinnar þá fórum við í Uppsali sem er bar og kaffihús á Hótel Centrum í Aðalstræti.  Þrátt fyrir að þjónustan þar sé ekki uppá marga fiska og kaffið einstaklega vont þá fengum við stórfenglega súkkulaðiköku og himneska eplaköku sem allir vöru sammála um að væru líklega þær bestu í bænum.  Eftir miklar umræður var því ákveðið að gefa staðnum einkunnina 1 gaffal af 5 mögulegum.  Sem sagt ef þig langar í góða köku með slæmu kaffi og engri þjónustu þá er Hótel Centrum staðurinn fyrir þig.

Flottur fiskréttur eftir páskana

Sjávarrétta Chow Mein með steiktum núðlum

Uppskrift fyrir tvo til þrjá:

100 gr. smokkfiskur

3-4 stk. skelfiskur

50-85 gr. rækjur

250 gr. Amoy Egg Noodles

2 msk. Amoy Light Soy Sauce

1 tsk. Amoy Sesame Oil

100 gr. strengjabaunir

1-2 vorlaukar, fínt skornir

1/2 eggjahvíta, létt þeytt

2 msk. hrísgrjónavín

1 tsk. salt

1 tsk. sykur

2 tsk. maísenamjöl hrært út með 1 msk. vatni

5-6 msk. olía

Hreinsið smokkfiskinn, skerið í hann krosslaga mynstur að innanverðu og skerið síðan í bita á stærð við frímerki. Setjið í pott með sjóðandi vatni. Fjarlægið bitana úr vatninu þegar þeir verða hvítir og hafa rúllast upp, skolið undir köldu vatni og látið vökvann renna af. Skerið hvern skelfisk í 3-4 bita. Afþýðið rækjurnar og skerið í 2-3 bita hverja ef þær eru stórar.

Hrærið saman eggjahvítu og maísenamjölsblöndu og setjið fiskinn út í. Sjóðið núðlurnar í ca. 3-4 mín. og setjið í sigti. Látið renna á þær kalt vatn, og hrærið 1 msk. af olíu saman við. Hitið um 2-3 msk. af olíu á forhitaðri pönnu, bætið út í baununum og sjávarréttunum og steikið í 2 mín. Setjið salt, sykur, sojasósu, vín og helminginn af vorlauknum, hrærið áfram í u.þ.b. mínútu. Fjarlægið hræruna af pönnunni og geymið. Hitið afganginn af olíunni, bætið við núðlunum og helmingnum af hrærunni. Steikið í 2-3 mín. og sejtið á stóran disk.

Hellið afganginum af hrærunni ofan á núðlurnar og skreytið með vorlauk og sesam olíu. Berið fram með Amoy Chili sósu.

Sígildur réttur frá Canton héraðinu í suðurhluta Kína. Þar sem Canton var fyrsta höfnin í Kína sem opnaðist fyrir erlendum viðskiptum, gætir þar mikils fjölbreytileika í matargerð.

íslenskir kínverskir túristar

Ein flottasti ljósmyndarinn í dag, Guðjón Snæland, kemur úr einni mestu myndatökufíkla fjölskyldu landsins, þetta eru eiginlega svona íslendingar sem ættu að vera kínveskir túristar, því þau eru hreinlega alltaf að taka myndir.  En ég er svo heppinn að þekkja þau öllsömul og hef átt óteljandi góðar stundir við að skoða frábært safn mynda sem þú hafa tekið vítt og breytt um heiminn.  Vildi bara benda ykkur á safn góðra mynda sem Guðjón hefur tekið. 

Þið komist inn á síðuna hans með því að smella á myndina.

Ég er ríkastur allra!

Þá erum við STÓR fjölskyldan komin heim úr bústaðnum, eftir vel heppnaða helgarferð með vinahjónum okkar (Júlla, Svölu og Katrínu Lilju). 

Við fórum í fallegu veðri uppí næst fallegasta stað lansins þe Borgarfjörðinn í sumarbústað rétt við Hreðarvatn.  Veðrið var ákaflega fallegt eins og sést á myndinni hér til hliðar, reyndar er það oftast nær svona gott þegar við erum uppfrá.... eða þannig

Sú minnsta í fjölskyldunni þótti það stórskemmtilegt að fá að róla í nokkrar klukkustundir yfir helgina, alveg ótrúlegt hvað svona litlir og einfaldir hlutir eins og róla geta veitt þeim litlu mikla gleði svo tímunum skiptir.  Á meðan ég var að róla með Emmu Brá þá var Hafdís Hrönn að myndast við að "baka" snjókökur fyrir allan peningin   Hún er líka alveg ótrúlega þolinmóð að leika sér við litlu systur sína.  Enda þegar ég fékk lángþráða hvíld frá rólunum, þá leysti hún mig af og bjó til stóra snjóköku með Emmu Brá, sem hafði reyndar mest gaman af því að skemma hana loksins þegar hún var fullgerð, en Hafdís Hrönn hefur þessa einstöku þolinmæði frá mér  svo hún byrjaði bara uppá nýtt aftur.... og aftur.... og aftur.  Þar til við fórum inn í bústað og fengum okkur eitthvað gott í svanginn.  Ég segi það satt, ég er ríkastur allra að eiga svona stóra fjölskyldu !

FORD - This program has performed an illegal operation and must be shut down

eða This Program Has Caused a Fatal Exception 0D at 00457:000040B1 and Will Be Terminated

og hvað gerir maður þá á 90km hraða á Reykjanesbraut ?  Nei, ég bara spyr

Microsoft-hugbúnaður fyrir Ford-bíla kynntur til leiks

Ógleymanlega fólkið

 Skemmtileg samantekt hjá Fréttablaðinu þar sem þeir rekja fólkið sem gerði árið 2006 ógleymanlegt.  Ég skil þó varla af hverju Nylon er þar á meðal, en svona er þetta.

Fréttablaðið, 30. des. 2006 12:00

Magni Ásgeirsson

Árið 2006 var um margt eftirminnilegt. Örfá atvik og gjörðir landans standa þó upp úr. Fréttablaðið tók saman lista yfir fólkið sem gerði árið ógleymanlegt.

Þeir sem allt þykjast vita um refilstigu tónlistar supu hveljur þegar spurðist að annarrar deildar sveitaballapoppari hefði komist áfram í Rock Star þáttunum. Hvað myndu hinir „ofursvölu" LA–rokkarar halda um Ísland. En allt fór á annan veg. Magni ekki bara sló í gegn og sveitaballabransinn hlaut verðskuldaða uppreisn æru og Magni bjargaði í leiðinni Skjá einum og rakaði saman seðlum fyrir Símann í formi SMS-skeyta.

Nylon-flokkurinn

Bubbi „eat your heart out". Arftakarnir koma úr óvæntri átt sannast sagna. Nylon-stelpurnar eru einu poppararnir sem mótmæltu hvalveiðum af einhverju viti með því að hætta við útgáfu plötu sinnar á Bretlandseyjum í kjölfari þess að Einar K. leyfði Kristjáni Loftssyni vini sínum að fara á ryðkláfi út á Ballarhaf og skutla nokkrar langreyðar með ófyrirsjáanlegum afleiðingum.

  

  

  

Eyþór Arnalds

Skrautleg ökuferð Eyþórs, þegar hann keyrði á staur og reynda að ljúga sig út úr því máli varð fréttamatur á árinu. „Hér er staur, en það er allt í lagi því ég er he-he-hermaur," mun Eyþór hafa sagt þegar hann klessti á staurinn. En batnandi mönnum er best að lifa og Eyþór fór í meðferð, þó hann ætti ekki við neitt sérstakt áfengisvandamál að stríða, sem gerir hann að AA-manni ársins.

  

  

Óli Geir Jónsson

Eyddi hálfu árinu í að berjast fyrir að endurheimta titilinn Herra Ísland eftir að Elín Gestsdóttir svipti hann honum með fruntalegum hætti. Svo má aftur um það deila hvort þarna hafi verið til mikils að vinna.

  

  

  

  

Bubbi Morthens

Einlægni Bubba hefur meðal annars gert hann að því sem hann er. Þjóðin elskar hann fyrir að segja hlutina eins og þeir eru. Grái fiðringurinn er staðreynd og Bubbi fer ekki í felur með það. Þess vegna tók þjóðin af heilum hug þátt í fimmtugsafmælisveislu sem Glitnir og Vodafone héldu goðinu sem kórónaði gott ár með því að bjóða nýjum tengdapabba sínum, árinu eldri, til veislu.

  

  

Jói og Gugga

Sýndu og sönnuðu að ástin sigrar. Þeim er að þakka að Jói í Kompás er sjónvarpsmaður ársins. Og broddborgurum landsins þykir vænna um mjúk rúm sín vitandi af því að til er það hlutskipti að vera á götunni.

  

  

  

  

Ásgeir Kolbeins og Arnar Gauti

Smekkur þeirra og skynbragð á það sem er „flott" og „kúl" og „inn" er óbrigðull. En hugsanlega ofmátu þessir elskuðu og dáðu og virtu fjölmiðlamenn stöðu sína þegar þeir flögguðu yfirlýsingum á borð við „ógeð" og „viðbjóður" um ástand venjulegrar íbúðar Ásgeirs fyrir breytingar í Innlit/útlit. Ummælin ollu miklu fjaðrafoki. Margir spurðu sig hvernig talsmáti þeirra félaga væri eiginlega þegar ekki væri kveikt á myndavélunum.

Samúel Kristjánsson

Ber ábyrgð á því að ofurfallegir jólatónleikar með þekktum söngdívum breyttust í martröð þar sem ríkti brjálað umferðaröngþveiti – skipulagsslys. Sem varð til þess að fagur jólasöngur féll í skuggann sem er skaði.

  

  

  

Unnur Birna Vilhjálmsdóttir

Þrátt fyrir sigra og velgengni á árinu stendur það upp úr þegar hún flaug á hausinn á Broadway eins og belja á svelli. En þó svo að þar hafi þeir sem hafa ekkert allt of þróaðan húmor fengið sitthvað fyrir sinn snúð, þá hélt hún reisn sinni og steig á fætur jafn gullfalleg og alltaf. Og „kikkstartaði" glanstímariti Reynis Traustasonar sem reyndi þar án árangurs að binda endi á fjölmiðlaþátttöku hennar. Sem er galin hugmynd.

Árni Johnsen

Sýndi og sannaði að hann hefur engu gleymt með ummælum sínum um „tæknileg mistök". En Árni þekkir sína þjóð betur en nokkur annar. Á það hefur verið bent oftar en einu sinni og oftar en tvisvar að þó þjóðin sé refsiglöð, og þar með sé fyrirgefningin ekki endilega ofarlega á blaði, þá hafa kjósendur minni á við gúbbífiska.

Pilla á dag kemur þyngdinni í lag - Gat verið !

Alveg er þetta ótrúlegt, maður er búinn að vera streða í líkamsrækt núna í rúmt ár til þess að missa þessi örfáu kíló sem maður hefur misst og svo kemur svona frétt, ein pilla á dag kemur skapinu í lag.  Þetta er nú bara ekkert réttlæti, þegar maður hefði geta grennst við það eitt að horfa á sjónvarpið og maula á pillu af og til og sleppt því að mæta þrisvar til fimm sinnum í viku klukkan 06.00 á morgnanna.  Fussum svei! 

Vísir, 27. des. 2006 20:40

Pilla á dag kemur þyngdinni í lag

Vísindamenn hafa þróað pillu sem að hjálpar fólki að grennast. Eftir prófanir kom í ljós að fólk sem hafði tekið eina pillu á dag í 48 vikur missti um 12% af líkamsþyngd sinni. Þetta jafngildir því að 100 kílóa maður myndi fara niður 88 kíló bara með því að bryðja eina pillu á dag í eitt ár.

Pillan virkar þannig að hún platar heilan til þess að trúa halda efnaskiptum hröðum og virkum allan sólarhringinn. Venjulega stjórnar heilinn hraða efnaskipta en svona er hægt að halda efnaskiptum hröðum og brenna kaloríum allan liðlangan daginn.

Buist er við því að pillan eigi eftir að koma á markað í Bretlandi á næstu árum en notkun lyfja til þess að meðhöndla offitu hefur aukist um 600% frá árinu 1999. Ljóst þykir því að eftirsóknin verður mikil í pilluna.