Það sem ekki er sagt

Fréttin er einna helst merkileg fyrir það sem ekki stendur í henni.  Einhvera hluta vegna ákveður mbl.is að birta hálfkláraða frétt sem segir nánast ekki neitt um stöðu mála í borginni.  Merkilegt að það skuli vanta hve stórt úrtakið var og hve há prósentan var sem svaraði könnuninni.  Einnig vantar í fréttina hvenær þessi könnun er gerð þ.e er þetta fyrstu vikuna í febrúar eða frá fyrsta til tuttugasta og níunda febrúar??  Það hlýtur að skipta töluverðu máli sérstaklega í ljósi þess hve neikvætt umtal borgarmálin hafa fengu framundir miðjan mánuð.

En vonandi horfir þetta allt til betri vegar og áhugavert verður að sjá könnun frá Gallup í mars og apríl, ég tel að þær muni frekar sýna hvernig staðan er og ég tala nú ekki um að þá fyrst gefst fólki tækifæri á að mynda sér skoðun á þeim miklu og góðu verkum sem framundan eru í borginni.

Aðeins 9% treysta borgarstjórn

Fögnum aðhaldi og hagræðingu

Eins og flestir stjórnendur vita þá ber að veita aðhald og hagræðingar í rekstri á hverjum tíma.  Yfirmaður borgarinnar þ.e borgarstjóri á síður en svo að fara á skjön við þá megin reglu.  Ég fagna því að farið verði yfir það hvar megi hagræða í rekstri borgarinnar okkur borgarbúum til hagsbóta.

Hinsvegar kemur það mér lítið á óvart að fulltrúi minnihlutans skuli vera fyrst til þess að blogga um þessa frétt og setja útá aðhald og hagræðingu þar sem flokkur hennar stuðlaði að mikilli skuldaaukningu borgarinnar þegar þau réðu ríkjum hér í borginni og ekki einungis stuðlaði flokkur hennar að auknum útgjöldum borgarinnar og skuldasöfnun heldur var útsvarið sett í hæstu hæðir og nýir skattar lagðir á borgarbúa en þrátt fyrir það náðist ekki að stoppa skuldasöfnunina.  En á því rúma eina og hálfa ári sem Vilhjálmur Þ. var borgarstjóri í samstarfi Sjálfstæðisflokks og Framsóknarflokks náðist ótrúlegur árangur í hagræðingu hjá borginni án þess að skerða þjónustu við okkur borgarbúa.  Ég fagna því fréttum þess efnis að skoða eigi möguleika á að draga úr útgjöldum borgarinnar.

Aukið aðhald hjá Reykjavíkurborg

Nú er spurning hver tók frá hverjum

Það er ansi margt keimlíkt í auglýsingum og stundum þegar maður er á ferðum erlendis þá verður maður óneitanlega var við það hve auglýsingar hvort heldur sem blöð, logo eða sjónvarpsauglýsingar eru líkar mörgum "íslenskum" auglýsingum nú eða þær íslensk líkar hinum, en það væri líklega hægt að þrátta um það eins lengi og maður hefur nennu til

Góður og menningarlegur sunnudagur en léleg þjónusta

Dagurinn í dag hefur verið sannkallaður fjölskyldudagur, eftir útréttingar og blómakaup í morgun héldum við fjölskyldan á vit menningar og lista hér í borginni.  Lá leiðin í Listasafn Reykjavíkur og Listasafn Ísland með viðkomu í Ráðhúsinu og að sjálfssögðu var komið við á tjarnarbakkanum svo sú stutta gæti nú heilsað uppá kvakandi liðið þar.

Í Listasafni Reykjavíkur sáum við áhugaverða sýningu eftir Steingrím Eyfjörð sem bar nafnið Lóan er kominn.  Sýningin samanstendur af fjórtán áhugaverðum verkum þó svo vissulega sum þeirra hafi hrifið okkur meira en önnur.  Einnig var spennandi sýning með verkum eftir Erró sem sérstaklega eldri dóttirin var hrifinn af enda litadýrðin mikil.

 

Í Listasafni Íslands sáum við sýninguna Streymið - La Durée en þar eru sýnd  verk þriggja myndlistamanna,  þeirra Guðnýjar Rósu Ingimarsdóttur, Gabríelu Friðriksdóttur og Emmanuelle Antille.  Þessi sýning höfðar kannski ekki til allra en flestir ættu að geta fundið eitthvað við sitt hæfi.

Eftir langa sunnudagsgöngu bæði innanhús í listasöfnunum sem og utanhús í miðborg borgarinnar þá fórum við í Uppsali sem er bar og kaffihús á Hótel Centrum í Aðalstræti.  Þrátt fyrir að þjónustan þar sé ekki uppá marga fiska og kaffið einstaklega vont þá fengum við stórfenglega súkkulaðiköku og himneska eplaköku sem allir vöru sammála um að væru líklega þær bestu í bænum.  Eftir miklar umræður var því ákveðið að gefa staðnum einkunnina 1 gaffal af 5 mögulegum.  Sem sagt ef þig langar í góða köku með slæmu kaffi og engri þjónustu þá er Hótel Centrum staðurinn fyrir þig.

Góð sameiginleg niðurstaða

Borgarstjórnarflokkur Sjálfstæðisflokksins stendur þétt við bakið á Vilhjálmi Þ. sem er oddviti flokksins hér í borginni.  Það er því einkennilegt að lesa hér á blogginu að ákvörðunum hefur verið frestað og borgin sé áfram stjórnlaus.  Í fyrsta lagi þá hefur borgin aldrei verið stjórnlaus nema hugsanlega í tíð R-listans á tímum skuldasöfnunar og í öðru lagi þá hefur engu verið frestað. 

Vilhjálmur hefur gefið út hvað hann varðar er opið hver tekur við embætti borgarstjóra af hálfu Sjálfstæðisflokksins í mars 2009. Borgarstjórnarflokkurinn mun ákveða borgarstjóraefnið í sameiningu þegar nær dregur.  Það liggur ekkert á að tilkynna hver verður í því sæti eftir rúmt ár, sú ákvörðun verður tekinn í fyllingu tímans með hagsmuni allra borgarbúa að leiðarljósi.

Ákvörðun síðar um borgarstjóra

Yfirlýsingar Vilhjálms Þ sem og borgarstjórnarflokksins

Yfirlýsing frá Vilhjálmi Þ. Vilhjálmssyni var að berast og segir hann það vera opið spil hver taki við embætti borgarstjóra af hálfu sjálfstæðisflokksins.

„Hvað mig varðar er opið hver tekur við embætti borgarstjóra af hálfu Sjálfstæðisflokksins í mars 2009. Borgarstjórnarflokkurinn mun ákveða borgarstjóraefnið í sameiningu þegar nær dregur.
         
Í samráði við borgarstjórnarflokkinn og með stuðningi hans hef ég ákveðið að gegna áfram starfi oddvita borgarstjórnarflokksins og formanns borgarráðs. Borgarfulltrúar flokksins munu áfram vinna saman af heilum hug í þágu borgarbúa það sem eftir lifir kjörtímabilsins.

Ég mun leggja mig allan fram við að vinna með öllum borgarbúum eins og ég hef gert hingað til.„

Þá sendi borgarstjórnarflokkur Sjálfstæðisflokksins einnig frá sér yfirlýsingu af gefnu tilefni og lýsir hann yfir óskoruðum stuðning við Vilhjálm.

„Borgarstjórnarflokkurinn lýsir yfir óskoruðum stuðningi við oddvita sinn, Vilhjálm Þ. Vilhjálmsson, og meðfylgjandi yfirlýsingu hans. Borgarstjórnarflokkurinn tekur undir það með Vilhjálmi, að ekki sé ástæða til að ákveða nú hver verði borgarstjóri eftir rúmt ár. Sú ákvörðun verður tekin af borgarstjórnarflokknum í sameiningu þegar nær dregur og með hagsmuni flokksins og borgarbúa að leiðarljósi.“

Var þess yfirlýsing samþykkt samhljóða og undir hana skrifuðu:
Áslaug María Friðriksdóttir, Kjartan Magnússon, Björn Gíslason, Kristján Guðmundsson, Bolli Thoroddsen, Marta Guðjónsdóttir, Gísli Marteinn Baldursson, Ragnar Sær Ragnarsson, Hanna Birna Kristjánsdóttir, Sif Sigfúsdóttir, Jórunn Ósk Frímannsdóttir, Þorbjörg Helga Vigfúsdóttir og         Júlíus Vífill Ingvarsson,

Hæst glymur í tómri tunnu...

...merkileg skilaboð það, ætli það hafi verið keppnisskap til staðar á milli þessara tveggja liða...

En Regína og Friðrik eiga svo sannarlega skilið að fá tækifæri til að fara út fyrir Íslands hönd, nú er bara spurning hvort "klassísku" bakraddirnar sem farið hafa út hópnum til halds og traust eða kannski bara til þess að halda í gamlar venjur þurfi nú að sleppa því að dilla sér og syngja en neyðast nú til þess að klæðast í þrönga dansgalla og sprikla, gæti verið hlægilegt að sjá Eyjólf halda danstakti.

En sigur Eurobandsins var sætur enda hafa þau undanfarin ár tekið þátt í forkeppnum sjónvarpsins og verið afar nálægt sigrinum.

 

Eurobandið fer til Serbíu

Kveðja til frænku

 

Í dag kvaddi ég eina merkustu konu landsins, Ástu Kristínu Eiríksdóttur ekkju Svavars Guðnasonar listmálara.  Hún Ásta var ákaflega skemmtileg kona og kunni margar sögu bæði sannar og aðrar sem voru "örlítið" kryddaðar.

Ein skemmtilegasta sagan sem Ásta sagði mér all oft var þegar hún og Svavar giftu sig í Kaupmannahöfn á sínum tíma. 

Dagurinn var mikill gleðidagur, líkt og hjá öðrum brúðhjónum, fóru þau skötuhjú saman í strætó í ráðhúsið þar sem þau voru pússuð saman en það sem meira er þau fóru heim með strætó með því að nota skiptimiðann frá ferðinni ofan í bæ, sparsemi og hnyttni hafa verið í háveigum höfð enda hafa kannski fjárráðin á þeim tíma ekki verið mikil.

Einnig er til önnur skemmtileg saga af þeim hjónum þegar þau fóru saman í laxveiði. 

Eins og allir þeir sem þekktu til Ástu vissu að hún var ein sú stundvísasta manneskja sem gekk um göturnar.  En í þessari frægu veiðiferð var Svavar búinn að næla í lax og var hann að myndast við að þreyta fiskinn áður en hann tæki hann upp á land.  Vildi svo óheppilega til að þegar þarna var komið við sögu þá var komið hádegi og kallað var til hádegisverðar í veiðihúsinu. 

Þegar Ásta var búin að bíða eftir manni sínum í dágóða stund og orðin talsvert sein í matinn þá tók hún upp skæri og klippti á línuna og sagði "Svavar, það er kominn matur og fólkið bíður".

Ég held að ég geti sagt að þetta væri ærin ástæða til sambandsslita einhverjum hjónum í það minnsta hefðu einhverjir öskrað.

En Ásta varð 96 ára í janúar s.l. og búin að lifa tímana tvenna hún hefur nú horfið til Svavars og systkina eftir góða lífsins göngu.  Ég efa það ekki að þar eru fagnaðarfundir og hittast nú systurnar Solla og Ásta sem voru svo skemmtilega ólíkar þrátt fyrir að vera nauðalíkar því báðar voru þær með stórt og opið hjarta fyrir alla þá sem á vegi þeirra urðu.

 

 

Merkilegt

  

Já það er merkilegt að enginn af þeim ökumönnum sem fóru þarna framhjá og urðu fyrir óþægindum hafi ekki stöðvað bifreið sína og ýtt við rörinu út í vegkantinn, það hefði ekki getað verið svo mikið mál og ekki tekið nema örfáar mínútur.

Rör féll af flutningabíl

Flott hjá MBL.IS

Eins óánægður og ég var þegar Nova auglýsingin tók að birtast hér til hliðar á blogginu mínu og ég nánast hætti að skrifa þá er ég hæst ánægður með þá þjónustu MBL.is að bjóða nú bloggurum sínum að greiða sanngjarna upphæð á mánuði til þess að losna við auglýsinguna.  Þessi upphæð er aðeins 300 krónur sem ekki getur nú talist mikið fyrir alla þá þjónustu sem MBL.is er að veita okkur bloggurunum.  Flott lausn sem allir ættu að geta sætt sig við.