Sérkennileg yfirlýsing Siðmenntar

Ég hef áður skrifað um störf siðmenntar og álit mitt á verkum þeirra.  Það er alveg með ólíkindum ef fjöldinn þarf að lúta í lægra haldi á móti tiltölulega fámennum hópi fólks sem hefur aðra skoðun en þorri landsmanna.

"Stjórn Siðmenntar fagnar álitinu og segir það í samræmi við þá skoðun stjórnarinnar að ekki eigi að skrá börn í trúfélög eða veraldleg lífsskoðunarfélög foreldra því börn á ekki að setja í bás eftir skoðunum foreldra þeirra.

Siðmennt telur að við 16 ára aldur, hið fyrsta, sé rétt að ungmenni geti skráð sig formlega í þessi félög, því forsenda slíkrar ákvörðunar sé  ákveðinn þroski, sjálfstæði og menntunarstig.

„Líkt og með stjórnmálaflokka á það ekki að vera í valdi foreldra að skrá börn sín í trúarleg eða veraldleg lífsskoðunarfélög, heldur á það að vera sjálfstæð ákvörðun hvers einstaklings þegar viðkomandi hefur aldur til.  Jafnframt álítur stjórn félagsins að þessi tillaga Jafnréttisstofu sé tímamótatillaga í átt til afnáms mismununar á rétti foreldra eftir kyni þeirra,“ segir í tilkynningu Siðmenntar."

Það er reyndar spurning hvort valið þurfi að vera móðurmegin þ.e í hvaða trúfélag barnið er skráð, nær væri líklega að foreldra myndu ákveða þetta í samráði ef um mismunandi trú væri að ráða.  Ég reyndar tel allt betra en að skrá barnið trúlaust og það fari á mis við það góða uppeldisgildi sem þjóðkirkjan hefur veitt íslenskum ungmennum í áratugi, landi og þjóð til heilla.

Siðmennt fagnar áliti Jafnréttisstofu

Til hamingju Grafhyltingar

Það var sannur gleðidagur í Grafarholtinu í dag, þegar við tókum í notkun og vígðum nýja kirkju.  Ég hefði reyndar kosið að kalla kirkjuna okkar Grafarholtskirkju en Guðríðarkirkja varð fyrir valinu meðal sóknarnefndar og við það verðum við að búa. 

Kirkjan stendur á fallegum stað hér í Grafarholtinu umlukin Kristinbraut, Kirkjustétt, Prestastíg og Biskupsgötu og því óhætt að segja að hún sé með góða nágranna.  Kirkjan er ákaflega falleg í alla staði þó svo hæst beri að nefnda einstaka altaristöflu eða öllu heldur altarisgarð sem gerir kirkjuna afar sérstaka.  Kirkjan er frekar "minimalísk" hún er björt og afar fögur með fallegum ljósum innviði.

Í kirkjunni verður unnið gott starf hvort sem litið er til trúar eða félagsauðar í hverfinu, því án efa verður kirkjan okkar miðpunktur hverfisins sem allir geta átt sitt athvarf í.

Kæru Grafhyltingar til hamingju með stórglæsilega kirkju og gott safnaðarstarf.

Biskup vígði Guðríðarkirkju

Forsetaleikur á kostnað almennings

Það verður seint hægt að segja um forsetaembættið að þeir hafi haft yfirsjón yfir rekstur embættisins, því undanfarin ár hefur embættið farið vel fram úr fjárheimildum sínum ár eftir ár.  Það er í raun merkilegt að fjölmiðlar skuli ekki hafa gert þessu betur skil í gegnum árin.

Það er þó merkilegt að lesa athugasemd frá embættinu þar sem gerð er tilraun til þess að klóra í bakkann vegna rekstursins m.a með því að benda á að við embættið starfi 8 manns og því sé þessi kostnaður ekki allur vegna forsetans sjálfs heldur vegna embættisins.

En til gamans þá segir í frétt Stöðvar 2 að farsímakostnaður embættisins sé 19.000 krónur hvern dag ársins og í athugasemd frá embættinu segir að það sé ekki forsetinn sjálfur sem talar svo mikið í síma heldur allir starfsmenn hans.  Það þýðir í raun að hver og einn starfsmaður talar fyrir u.þ.b. 2.375 krónur á hverjum degi, allan ársins hring.  Það þýðir að hver og einn starfsmaður er með farsímakostnað uppá u.þ.b. 71.250 krónur á mánuði. 

Einnig er rætt um í fréttinni að bensínkostnaður forsetans sé rúm milljón fyrstu 10 mánuði ársins, hann hefur að vísu þrjá bíla til umráða.  Í athugasemd frá embættinu segir að þetta sé ekki kostnaður einungis vegna forsetans heldur einnig annarra starfsmanna.  Ég leyfi mér að spyrja, hve margir starfsmenn eru með bifreið frá embættinu og hvers vegna?

En ég hefði gjarnan vilja sjá fleiri tölur vegna fjárútláta embættisins í fréttatíma Stöðvar 2, en líklega hefði fréttatíminn ekki dugað til þess.

Nú ætti forsetinn í ljósi aðstæðna í þjóðfélaginu að halda að sér höndum og gæta þeirra fjármuna sem við útdeilum honum enda er það skilda hans að fara vel með það almannafé sem fer í rekstur embættisins.

Forsetaembættið mótmælir frétt

Skiljanlegur niðurskurður

Það er alltaf sárt þegar skera þarf niður í rekstri hvort heldur sem er hjá einka- eða ríkisfyrirtækjum.  Það er í raun eðlileg og skilyrðislaus krafa okkar að ríkið gæti aðhalds í öllum rekstri bæði öllu því sem snýr að stjórnsýslu sem og ríkisfyrirtækja eins og Ríkisútvarpsins ohf.  Það hafa lengið verið sögur á kreiki um að þessi stofnun hafi því miður ekki gætt hófs í rekstri og það er reyndar með öllu óskiljanlegt að stofnun eins og þessi sem fær hart nær 3.000 milljónir frá ríkinu á hverju ári til reksturs fyrir utan aðra tekjuliði skuli ekki geta rekið sig betur en raun ber vitni.  Í gegnum árin hefur stofnunin verið rekin með miklu tapi sem vitanlega er með öllu óásættanlegt. 

Ég tel það vera skildu útvarpsstjóra að skera niður og ná utanum rekstur stofnunarinnar og tel það reyndar afar mikilvægt hann geri það áður en ríkisútvarpið fer að hluta eða öllu leyti út af auglýsingamarkaði, enda eru enginn rök fyrir því að ríkið sé í beinni samkeppni við einkafyrirtæki svo ekki sé nú talað um undirboð til þess að reyna grafa undan rekstri einkafyrirtækja.

Næstu skref sem ég myndi vilja sjá er að stofnuninni verði óheimilt að selja auglýsingar næstu 12 mánuði nema í formi skjáauglýsinga og samlesnar auglýsingar í hádeginu.  Að þeim tíma liðnum yrði staðan endurmetin með tilliti til samkeppnissjónarmiða m.a í tilliti til eignatengsla annarra fjölmiðla.  Afnotagjöld stofnunarinnar verði afnuminn og innheimt í formi skatta enda eru afnotagjöldin ekkert annað ein bein skattheimta af heimilum landsins.  Reyndar gæti það verið fróðlegt að kanna hvort ekki væri hægt að setja upp áskriftarkerfi og stofnunin gæti selt aðgang að netinu sínu svipað og 365 gerir í dag.  Með þeim hætti gæfist þeim sem vildu kostur á að kaupa sér áskrift og aðrir sem ekki kjósa að vera áskrifendur sjá ekki dagskrána. 

Aðför að fréttastofunni

Alvöru kappræður í kvöld kl. 20.00 - Guðlaugur Þór og Ögmundur taka takast á

 

Nú er komið að því að halda fund sem lengi hefur verið þörf fyrir. Nú í kvöld kl. 20.00 verða haldnar alvöru kappræður milli tveggja manna, engar langar framsögur hvorki frá fundarstjóra né fundarmönnum.

Kappræður verða milli stjórnmálamannanna Guðlaugs Þórs Þórðarsonar heilbrigðisráðherra og Ögmundar Jónassonar, þingflokksformanns VG, í kvöld í Öskju, húsnæði náttúrufræðideildar Háskóla Íslands og hefst fundurinn kl.20 Þau mál verða tekin fyrir sem mest eru í umræðunni um þessar mundir. Umræðuefni kvöldsins verður Icesave - IMF - ESB.

Formaður Vinstri grænna tefur framgang mála

 

Það hefur nú komið í ljós hvers vegna Björn Bjarnason, dóms-og kirkjumálaráðherra hefur ekki tekist að stofna fyrirhugaða rannsóknarnefnd sem á að fá það verkefni að skoða hrun bankanna hér á landi.  Þrátt fyrir ítrekaða gagnrýni Steingríms J. Sigfússonar, formanns Vinstri grænna á seinagang ríkisstjórnarinnar í þessu máli hefur komið í ljós að hann sjálfur er aðal orsökin fyrir því að nefndin hefur ekki tekið til starfa.

Það er formaður Vinstri grænna sem stendur í vegi fyrir því að hægt sé að skoða þær alvarlegu ásakanir sem fjöldin allur af einstaklingum hefur þurft að sitja undir, það er formaður Vinstri grænna sem hefur hamlað því að hægt sé að skoða málin ofan í kjölinn og velta við öllum steinum svo sannleikurinn komi í ljós.  Þetta kom í ljós þegar Björn Bjarnason, dómsmálaherra flutti ræðu í alþingi seinnipart mánudags.

Ég tek mér það bessaleyfi að setja inn hluta af ræðu Björns hér

"Virðulegi forseti. Síðastliðinn föstudag var til umræðu frumvarp frá mér um sérstakan saksóknara og ég vona að hv. allsherjarnefnd flýti afgreiðslu þess máls og það verði að lögum. Það er nauðsynlegt að velta hverjum steini varðandi þau mál sem upp hafa komið, bæði af hálfu saksóknara og einnig af hálfu annarra aðila, og ég fagna því að á Alþingi er unnið að því að móta tillögur um sérstaka nefnd sem taki þetta að sér. Það var undarlegt að heyra hv. þingmann Vinstri grænna kvarta undan því áðan í ræðu að það hefði tafist að koma þessu starfi á vegum þingsins á legg þegar við þingmenn vitum að það er hv. formaður Vinstri grænna sem helst hefur tafið fyrir þessu verki innan veggja þingsins. Það er helst hann með fyrirvörum sínum og sinni afstöðu sem hefur spillt því að samstaða næðist um það (SJS: Þetta er þvættingur og ?) að koma þeirri nefnd á laggirnar. (SJS: Étt´ann sjálfur.)

Virðulegi forseti. Er þetta orðbragð sem á við í þingsölum?

(Forseti(RR):Forseti biður hv. þingmenn um að gæta hófs í orðavali.)

Þingmenn Vinstri grænna geta ekki komið hér og staðið og sagt að verið sé að tefja það að koma á laggirnar rannsóknarnefndum og síðan stendur formaður þeirra í vegi fyrir því að samstaða náist í þingsalnum um þetta og meðal forsætisnefndar.

(Forseti(RR):Forseti biður hv. þingmenn um að gæta hófs í framgöngu.)

Það verður að hafa þessa hluti eins og þeir eru og menn verða að ræða þá eins og þeir eru og ekki fara í neinn feluleik með þetta frekar en annað sem þarf að ræða í þingsalnum og meðal þjóðarinnar þegar fjallað er um þessi mál. Menn verða að standa við það og ef þeir geta það ekki og vilja ekki samstöðu um þetta í þinginu þá verður það að koma fram að þá verður að upplýsa það."

Eins og flestum ætti að vera kunnugt um reiddist Steingrímur mjög við það að ráðherra kæmi fram með þessar upplýsingar enda eðlilegt þar sem hann hafi fyrr um daginn gagnrýnt seinagang vegna málsins.

Ég leyfi mér að efast um heilindi þess að umræddur formaður taldi sig knúinn að bera fram vantrausttillögu á ríkisstjórn landsins.  Það er miður þegar menn vilja nota sér ástandið sem nú ríkir í þjóðfélaginu til eigin framapots í stjórnmálum.  Þó svo ég telji það flokknum síður en svo til framdráttar að þingmaður hans taki þátt í rótækum mótmælum eða formaður flokksins skuli fara með fleipur g ósanngjarnar ásakanir, líkt og hann hefur gert undanfarið.  Honum ætti að vera það ljóst að unnið er allan sólahringinn til þess að vinna ötullega að lausn vandans og þar fer Geir H. Haarde fremstur í flokki að öðrum ólöskuðum. 

Það er reyndar mín skoðun að þegar reiðin rennur af fólki, sem mun gerast fyrr en síðar, þá muni fólk sjá í gegnum þessa leikfléttu forystusveitar Vinstri grænna og fylgi þeirra í skoðanakönnunum dvína á nýjan leik, þá er spurning hvort formaðurinn vilji enn ganga til kosninga eða hvort hann verði búinn að taka upp þá skoðun, líkt og áður var, að ekki væri ráð að ganga til kosninga þar sem þjóðin þyrfti að standa saman að lausn málanna og vinna með ríkisstjórninni en ekki á móti.

Eins og ég hef skrifað áður þá ritaði ég formanninum bréf í gærkvöldi þar sem ég óskaði eftir svörum við fáeinum spurningum, ekki hef ég enn fengið svör við þeim spurningum.

Myndbandsupptöku af ræðu Björns Bjarnasonar, dóms- og kirkjumálaráðherra og viðbrögð Steingríms J Sigfússonar, formanns Vinstri grænna má sjá í þessari myndklippu

Fjármálanámskeið í öllum hverfum borgarinnar í boði Neytendasamtakanna og Reykjavíkurborgar

Námskeið um fjármál og heimilisbókhald í öllum hverfum borgarinnar.  Námskeiðin eru haldin af Neytendasamtökunum með stuðningi Reykjavíkurborgar.

Námskeiðið er fólki að kostnaðarlausu og snýr efni þess einkum að hagræðingu í heimilishaldi, heimilisbókhaldi og góðri yfirsýn í fjármálum.

Námskeið verða haldin í eftirtöldum hverfum fyrir áramót og hægt er að skrá þátttöku hjá þjónustumiðstöðunum:

Grafarholt: 26. nóvember kl. 19: 30 - 21:30, Þórðarsveig 3, sími 411 1111.

Árbær: 27. nóvember kl. 19:30 - 21:30, Hraunbæ 105, sími 411 1111.

Grafarvogur og Kjalarnes: 3. des kl. 19:30-21:30, Miðgarði, sími 411 1111.

Hlíðum, Holtum og Norðurmýri: 4. desember kl.17:30-19:30 í félagsmiðstöðinni Lönguhlíð 3, sími 411 1111.

Vesturbær: 8. desember kl. 17:00-19:00 í Vesturgarði, sími 411 1111.

Laugardalur og Háaleiti: 10. des. kl. 17:00-19:00 á Þjónustumiðstöð Laugardals og Háaleiti, Síðumúla 39, sími 411 1111.

Miðborg frá Rauðarárstíg að Garðastræti: 11. desember kl. 17:30-19:30 í Félagsmiðstöðinni Vesturgötu 7 sími 411 1111.

Breiðholt: 16. des kl. 17:30-19:30 Þjónustumiðstöð Breiðholts, Álfabakka 12, Mjóddinni, sími 411 1111.

Námskeiðin eru ókeypis en nauðsynlegt er að skrá sig - hámark 25 manns á námskeið.

Skyldi stjórnarandstaðan hafa fengið einhverjar spurningar og fundur með Guðlaugi Þór heilbrigðisráðherra

Það var ánægjulegt að sjá hve margir höfðu tækifæri á að sækja fundinn í Háskólabíó, samkvæmt fréttum var allt fullt út úr dyrum og það er vissulega gleðilegt.  Enn ánægjulegra var að heyra að stór hluti ríkisstjórnarinnar hafi mætt ásamt þingmönnum, vitanlega komust ekki allir á þennan fund eins og t.d. Guðlaugur Þór Þórðarson, heilbrigðisráðherra, sem var á fundi í Menningarmiðstöðinni Gerðubergi á sama tíma.

En mér leikur forvitni á að vita hvort stjórnarandstaðan hafi fengið einhverjar spurningar úr sal og ef svo hverjar þær voru. 

Skildi einhver hafa spurst fyrir um vantraust tillögu þeirra sem lögð var fyrir þingið í dag? 

Skyldi einhver hafa spurt hvort eðlilegt væri að alþingismaður væri virkur þátttakandi í róttækum mótmælum gegn lögreglunni á Höfuðborgarsvæðinu, líkt og Álfheiður Ingadóttir þingmaður Vinstri grænna gerði á laugardaginn? 

Skyldi einhver hafa spurt stjórnarandstöðuna um þær lausnir sem þessir þrír þingflokkar leggja til vegna þess ástands sem ríkir nú í þjóðfélaginu? 

Án þess að ég vilji fullyrða nokkuð, þá leyfi ég mér að efast um að þessar spurningar hafi verið bornar upp.

Þetta eru þó spurningar sem ég hefði gjarnan vilja fá svör við og án efa spurt um ef ég hefði komist á fundinn.  Ég hef þó ákveðið að senda þessar spurningar á formann Framsóknarflokks, Frjálslindaflokks og Vinstri grænna og bíð spenntur eftir svari.  Ef ég fæ svör verða þau að sjálfssögðu birt í athugasemdum.

Ég sótti hinsvegar opin fund með Guðlaugi Þór, heilbrigðisráðherra, og var hann afar gagnlegur.  Fór ráðherrann yfir efnahagsmál sem og kynnti heilsustefnu sem ber heitið "Heilsa er allra hagur".  Þar er á ferðinni metnaðarfull og afar áhugaverð stefna sem ráðherrann hefur sett í laggirnar.  Eftir að framsögu lauk svarði ráðherrann fyrirspurnum úr sal sem voru fjölbreyttar.   Sem sagt mjög góður og skemmtilegur fundur í Breiðholtinu.

„Þetta er þjóðin“

Launaður atvinnumótmælandi

Það væri forvitnilegt að vita af hverju fjölmiðlar gera svona mikið úr því að atvinnumótmælandi hafi verið handtekinn fyrir að hafa ekki greitt sekt sína.  Eins einkennilegt og það kann nú að hljóma þá hefur þessi einstaklingur vitað af þessari vararefsingu því hún hefur án efa verið lesin upp fyrir dómi á sínum tíma.

En hjá mótmælandanum hafa hlutirnir breyst hratt því hann hefur farið úr þeim flokk að vera í þeim hópi fólks sem safnast saman við hvert það tækifæri sem gefst til þess að mótmæla (atvinnumótmælandi) yfir í þann hóp að vera launaður atvinnumótmælandi því fyrir verk sitt fyrir austan hefur hann nú fengið greiddar tvöhundruð þúsund krónur og þá er spurning hvort hann sé trúr "sannfæringu" sinni lengur þegar hann mótmælir ekki lengur fyrir hugsjónina eina saman.

En maður veltir því eðlilega fyrir sér hvort hann gefi þessi laun ekki upp til skatts annaðhvort sem  laun eða gjöf, hann ætlar kannski að mótmæla á þeim vettvangi líka?

Var ekki látinn vita

"Klassískur" atvinnumótmælandi

Það er alveg ótrúlega mikið gert úr þessu, þe. að þessi einstaklingur hafi fyrst verið handtekinn og nú að honum hafi verið sleppt.  Það getur nú ekki þótt merkilegt að flagga saklausum fána á alþingishúsinu og ekki þykir nú þessi einstaklingur merkilegur fyrir það eitt að hafa flaggað honum. 

Miðað við fréttirnar er þessi aðili einn af þessum "klassísku" atvinnumótmælendum sem virðast ekki hafa neitt fyrir stafni annað en að mótmæla og virðist í raun eini tilgangur hans vera að komast í fréttirnar.  Sem honum hefur svo sannarlega tekist núna að gera.

 

 

 

Fanganum sleppt