Guðlaugur Þór hefur dug og kjark sem þarf til þess að gera breytingar

Það hljóta að hafa verið erfiðir dagar undanfarið hjá Guðlaugi Þór, heilbrigðisráðherra.  Það er ekki auðvelt verk að ætla sér að stokka upp í rótgrónu heilbrigðiskerfi okkar landsmanna. 

Flest allir geta tekið undir með Guðlaugi Þór að breytinga er þörf í heilbrigðiskerfinu.  Breyta þarf áherslum og starfsemi kerfisins.  Síðan Guðlaugur tók við ráðherraembætti hefur hann sett sig vel inn í málaflokkinn og unnið hörðum höndum við skipulagningu m.a nýrrar heilsustefnu sem ber heitið Heilsa er allra hagur, stefnuna má finna á heimasíðu ráðuneytisins.  Hann hefur einnig unnið að endurskipulagningu heilbrigðisþjónustunnar með það að markmiði að einfalda stjórnsýslu, auka hagkvæmni í rekstri og tryggja starfsemi heilbrigðisstofnana. 

Samkvæmt vef heilbrigðisráðuneytisins þá verða megin breytingar sem varðar spítalarekstur á Höfuðborgarsvæðinu og nágrenni þess eftirfarandi:

• St. Jósefsspítala-Sólvangi verður alfarið falið hlutverk á sviði öldrunarlækninga og hvíldarinnlagna
• Sérfræðingum og fagfólki, sem þar hafa gert skurðaðgerðir, verður boðin aðild að því að byggja upp        skurðstofurekstur í nýrri aðstöðu á Suðurnesjum 
• Meltingarsjúkdóma - og lyflækningadeild verður tengd starfsemi á Landspítalans og hin góða reynsla af göngudeildarstarfsemi á St. Jósefsspítala þróuð með sérfræðingum þaðan
• Landspítalinn mun yfirtaka skurðstofurekstur á Selfossi
• Vaktir á skurðstofum á Selfossi og í Keflavík verða lagðar af

Einnig verður farið í breytingar á landsbyggðinni.  Breytingarnar fela í sér verulega einföldun stjórnsýslu stofnana með sameiningu þeirra og ákvörðun um stóraukna samvinnu þeirra. Er þetta meðal annars gert í framhaldi af setningu nýrra laga um heilbrigðisþjónustu sem tóku gildi fyrir rúmu ári.

Þetta eru helstu breytingarnar á landsbyggðinni:

• Allar heilbrigðisstofnanir og heilsugæslustöðvar á Norðurlandi verða sameinaðar í eina undir forystu Sjúkrahússins á Akureyri, sem verður Heilbrigðisstofnun Norðurlands og mun m.a.  taka við hlutverki ráðuneytisins varðandi samning um heilsugæsluna á Akureyri
• Allar heilbrigðisstofnanir og heilsugæslustöðvar á Vesturlandi verða sameinaðar í eina með höfuðstöðvar á Akranesi
• Heilbrigðisstofnun Vestmannaeyja verður sameinuð Heilbrigðisstofnun Suðurlands sem jafnframt tekur við umsjón með samningi sem í gildi er milli Heilbrigðisstofnunarinnar á Höfn í Hornafirði og heilbrigðisráðuneytisins
• Heilbrigðisstofnunin á Patreksfirði sameinast Heilbrigðisstofnun Vestfjarða sem hefur höfuðstöðvar á Ísafirði
• Aukið verður enn frekar samstarf milli Heilbrigðisstofnunar Austurlands og sjúkrahússins á Akureyri

Einfaldari stjórnsýsla, hagkvæmari rekstur og aukin samvinna stofnanna er talin geta dregið verulega úr útgjaldaaukningunni sem er staðreynd varðandi þær stofnanir sem hér eiga í hlut, en markmið breytinganna er að slá skjaldborg um og tryggja kjarnastarfsemi þessara mikilvægu stofnana á sviði heilbrigðismála á erfiðum tímum.

Flest erum við þannig gerð að við viljum sem fæstar breytingar í nærumhverfi okkar.   Við getum hinsvegar oft ef ekki yfirleitt fagnað róttækum breytingum sem gerðar eru annarsstaðar en hjá okkur.  Þær breytingar sem Guðlaugur Þór er að gera núna eru vissulega róttækar breytingar en þær eru þarfar.  Þess vegna megum við ekki láta fáa hagsmunaaðila spilla fyrir annars góðum og þörfum breytingum.

Ef við tökum sem dæmi starfsemi St. Jósefsspítala-Sólvangi, þar er verið að sérhæfa stofnunina í öldrunarþjónustu líkt og Sólvangur hefur sinnt í gegnum árin.  Önnur þjónusta færist á Suðurnesin eða á aðra spítala höfuðborgarsvæðinsins.  Öllu starfsfólki hefur verið boðið að starfa áfram en á breyttum vinnustöðum.  Fyrir þá sem búsettir eru í Hafnarfirði þá er álitamál hvort það sé betra að aka niður á Landsspítala eða suður með sjó í Reykjanesbæ, líklega er það jafn langur tími á annatíma í umferðinni.  Það verður áfram starfsemi í St. Jósefsspítala-Sólvangi því þar verður öldrunarþjónusta, er það svo slæmt?  Ég tel ekki svo vera.

Við eigum að fagna þeim breytingum sem komið hafa fram hvort heldur sem er hér í höfuðborginni eða úti á landsbyggðinni.  Við eigum að vera óhrædd við breytingar og eigum þess í stað að fagna því að loksins er kominn ráðherra í heilbrigðismálin sem hefur dug og kjark til þess að gera nauðsynlegar breytingar.  Mín ósk er sú að hann taki enn betur til í heilbrigðiskerfinu því þess er ekki vanþörf og hægt er að nefna mörg dæmi um réttmæta hagræðingu á þeim vettvangi.

Samfylkingarfólk í Skagafirði mótmælir

Er einhver eftirlitsaðili eða stofnun sem sinnir starfi sínu?

Ég er nú alvarlega farinn að hugsa um hvort það sé einhver eftirlitsaðili eða eftirlitsstofnun sem er í raun að sinna starfi sínu.  Hvað hafa þessar stofnanir verið að gera undanfarna mánuði eða öllu heldur undanfarin ár?

Hvernig getur það gerst að bílaleigubifreið er ótryggð í útleigu eða öllu heldur ótryggð yfir höfuð?  Í fréttinni segir að mál hennar séu nú til rannsóknar, hvar hafa eftirlitsaðilar verið??

Ríkisskattstjóri er að athuga hverjir séu raunverulegir eigendur um 300 stærstu hlutafélaga hér á landi, samkvæmt fréttum í dag.   Er þetta ekki eitthvað sem ríkisskattstjóri ætti að vera með nú þegar?

Fjármálaeftirlitið hefur ekki unnið vinnuna sína undanfarin ár eins og sést hefur síðustu vikur og mánuði.  Spurningin er í raun hvar maður ætti að byrja á þeirri upptalningu sem fjármálaeftirlitið hefur ekki sinnt skyldum sínum.  Staða íslensku bankanna, rannsókn KPGM á Glitnir.  Forstjórinn virðist hinsvegar vera fullkunnugt um hve marga frídaga hann á enda búinn að vera í fríi frá því fyrir jól, þrátt fyrir það ástand sem nú ríkir í þjóðfélaginu.

Eftirlit í byggingariðnaði hefur verið ábótavant síðustu ár ef nokkurt.  Verktakar virðast hafa fengið að byggja án athugasemda og hver sem er getur líklega orðið byggingarstjóri yfir nýbyggingum enda er það með öllu marklaus ábyrgðartitill.

Samkeppniseftirlitið, hefur verið sofandi og sinnt sínum skildum bæði hægt og ílla.  Mál sem komið hafa til kasta stofnunarinnar hafa dregist á langinn og lítið sem ekkert komið út úr þeim.  Líklega er nærtækast að rifja upp mál olíufyrirtækjanna.

Hér að ofan eru reyndar aðeins taldar örfáar af þeim eftirlitsaðilum og stofnunum sem eiga að sinna skildum sínum, landi og þjóð til heilla. 

Það er einfaldlega kominn tími á endurskipulagningu í þessu kerfi með eitt markmið, gera kerfið skilvirkara. 

Bílaleigubílar reyndust ótryggðir

Ertu viti eða hálf viti?

Var það ekki Pétur sem sagði eitt sinn  í útvarpsþætti hjá Svavar Gests þegar Svavar sagði "Pétur, þú ert nú svo hár að þú gætir verið viti"..... þá svaraði Pétur rólega "já og þú eins og hálf viti" :-)

Hér í Grafarholti er hinsvegar ár lýðheilsunar - nú skal það tekið með trompi.

Ár hálfvitans

10, 100, 1.000 eða 10.000 manns - bíddu eða gleymdi ég að telja 1 eða 2, berst að byrja aftur !

Það hefur á köflum verið borslegt að fylgjast með fréttaflutningi af þeim mótmælum sem hafa verið undanfarið því á meðan skipuleggjendur mótmælana telja að á svæðinu hafi verið þúsundir mótmælenda þá hefur lögreglan talið að um mun færri hóp mótmælenda hafi verið að ræða.  Líkt og við Hótel Borg á gamlársdag sagði lögreglan að um 150 til 200 manna hóp hafi verið að ræða á meðan vinstri grænir töldu að þarna hafi verið um 500 til 600 manns hafi verið á svæðinu.  Sama á við um mótmælin nú í dag á Austurvellinum þar sem skipuleggjandinn taldi sig sjá þúsundir manna þá sagði lögreglan að um 1500 til 2000 manns væru á svæðinu.  Spurningin er hvor aðilinn skyldu hafa meiri reynslu á "talningu" í miðbæ Reykjavíkur?  Líklega lögreglan þar sem hún hefur mikla reynslu í talningu eða ágiskun á fjölda fólks í miðbæ Reykjavíkur.

Það er spurning hvort ekki þurfi að kalla fram manninn með bestu molanna, Finn Ingólfsson stjórnarmann Frumherja, þeir gera sig einu sinni út fyrir að vera með löggildingar, þeir hljóta að geta soðið saman löggilda talningu fyrir landann og ekki væri nú verra að sjálfur Finnur Ingólfs geti nú grætt örlítið á löggildingunni.

En varðandi mótmælin í dag á Austurvellinum þá get ég ekki annað en tekið að ofan fyrir Herði Torfa fyrir það að mótmæla mótmælendunum sem mótmæla andlitbirtingu og mótmæla því að mótamæla með óhulið andlit við mótmæli, brátt verður það líklega þannig að mótmælendur fari að mótmæla sjálfum sér og saman standa þeir svo mörg þúsund manns að mótmæla mótmælum vegna mótmæla. 

Hinsvegar hef ég ákveðið að mótmæla að barn sé selt á mótmælum líkt og um gripasölu væri að ræða, þar sem barn er látið fara fram með skoðanir foreldra sinna eftir að búið er að hlíða barninu vel og vandlega yfir.  Slíkt er vitanlega ekki eðlilegt enda afar ósmekklegt af foreldrum að ota barni sínu svona fram til þess að reyna fanga athygli fjölmiðla.
.

Mótmælt á Austurvelli

Er Steingrímur farinn að finna ilm af völdum?

Ekki er maður hissa á þeirri skoðun Steingríms að hann vilji kosningar sem fyrst og helst strax enda alls óvíst hve lengi þessi stuðningur varir sem nú virðist vera koma fram í skoðanakönnunum.  Ég tel það þó nokkuð víst að Vinstri grænir muni ekki fá um þrjátíu prósent fylgi í kosningum.  Því áður en fólk gengur inn í kjörklefa þá vill það sjá lausnir ekki einungis gaspur og gagnrýni.

Steingrímur vill ekki kosningar fyrir þjóðina, hann vill kosningar fyrir sig sjálfan því hann telur að stólinn sé hans.  Hann telur sig vera kominn með nægilega gott fylgi sem gæti tryggt honum forsæti í nýrri ríkisstjórn, Guð forði okkur frá þeim gjörningi að slíkt gæti gerst.

Það væri skemmtileg tilbreyting ef Steingrímur kæmi fram með einhverjar lausnir í stað þess að standa í skipulagningu mótmæla líkt og þingmenn flokksins hafa verið að gera að undanförnu.  Þar sem bæði formaður og þingmenn hans hafa hreinlega hvatt til ofbeldisfullra mótmæla sem hafa haft í för með sér skemmdaverk á eigum almennings og einkaaðila.  Spurning hvort vinstri grænir séu reiðubúnir að greiða fyrir þær skemmdir sem voru t.d. á lögreglustöðinni eða við Hótel Borg?

Kosningar óumflýjanlegar

Fámennur hópur, meðalgreinda einstaklinga

Alveg er þetta merkilegt að fámennur hópur einstaklinga, sem ég leyfi mér að kalla meðalgreindra einstaklinga skuli geta leyft sér að eyðileggja eigur annarra bæði tækjabúnað sem og annan búnað.  Því miður náði þessi hópur því fram að eyðileggja nægilega mörg tæki svo hætta þurfti útsendingu Kryddsíldarinnar sem var í miðri sýningu á Stöð2.

Ég geri ráð fyrir að þetta fólk taki nú glatt um veskið og greiði fyrir þær skemmdir sem þau hafa valdið, enda telja þeir sig sjálfskipaða boðbera ábyrgðar og með látum kalla þau eftir ábyrgð stjórnvalda og stjórnenda í fjármálakerfinu.  Kallað er eftir að fólk beri ábyrgð á eigin verkum.  Líklega verður slíkt ekki uppi á þessari samkomu enda eiga sömu lög, sem gilda fyrir almenna landsmenn ekki, að gilda um þetta lið.

Þegar ég skoða myndir af þessum fámennum mótmælum sem líklega telja ekki nema rétt um hundrað einstaklinga, ef það nær því, þá velti ég því fyrir mér af hverju er verið að bjóða uppá slysaþjónustu á staðnum.  Væri ekki nær að þetta fólk færi upp á slysadeild og greiddi sín komugjöld þar og fengi þá hjúkrun sem þar er boðið uppá.

En þar sem ég þykist vita að pósthólfið hjá manni fyllist eða athugasemdakerfið þar sem maður er ekki samála þessu fólki þá tek ég það skýrt fram að ég er ekki á mótmælum.  Friðsamleg mótmæli, jafnvel með hrópum og köllum er að sjálfssögðu réttur hvers manns enda búum við í þjóðfélagi sem ritskoðun er ekki tíðkuð nema á ákveðnum fjölmiðlum s.s. Fréttablaðinu, DV og Stöð2.

Þennan fámenna hóp þarf að stöðva áður en hann veldur frekari skemmtum á eigum okkar almennings og einkaaðila.

Fólk slasað eftir mótmæli

Maður er alltaf að græða

Sem betur fer er maður stundum að græða og er þetta ekki akkúrat dæmi um slíkt.  Nú græðir maður heila sekuntu, þetta minnir einna helst á ákvöxtunina mína í gamla bankanum

Áramótunum seinkar

Gleðilega hátíð ljóss og friðar

 

Einn af okkar uppáhalds sálmum hljóðar eitthvað á þessa leið

“Nú árið er liðið í aldanna skaut
og aldrei það kemur til baka,
nú gengin er sérhver þess gleði og þraut,
það gjörvallt er runnið á eilífðar braut,
en minning þess víst skal þó vaka.”

Því við vitum þegar þau tímamót eru kominn ár hvert að syngja þennan sálm, þá er
viðburðarríkt og skemmtilegt ár að kveðja. Það má svo sannarlega segja það um árið
2008.

Hjá okkur hefur margt gerst bæði persónulega og hjá þjóðinni allri. Til að mynda ákvað fjölskyldan að sendaekki út hefðbundin jólakort, þ.e ef hægt er að segja að
kortin okkar hafi einhvertímann verið hefðbundinn. Þess í stað ákváðum við að senda út jólakveðju með þessu sniði og setja frekar þá fjármuni sem hefðu farið í kaup á
jólakortum sem og póstburðagjöld til góðgerðamála og hefur sú fjárhæð þegar verið greidd. Fjölgun varð á heimilinu þegar við fluttum inn dreng sem er
íslensk ættaðan bæði í karl og kvenlegg frá Danmörku hefur hann verið hjá
okkur frá því í haust.

“En hvers er að minnast og hvað er það þá,
sem helst skal í minningu geyma?
Nú allt er á fljúgandi ferð liðið hjá,
það flestallt er horfið í gleymskunnar sjá.
En miskunnsemd Guðs má ei gleyma.”

Árið hefur verið ferðaár hjá okkur því við fórum í heimsókn til Þórs og Huldu sem búsett voru í Kaupmannahöfn og að sjálfssögðu nýttum við tækifærið og heimsóttum Margréti í leiðinni eða allavega kaffihúsið sem stendur rétt við litla kofan hennar. Sem líklega er ein af fáum byggingum sem “við” íslendingar áttum ekki á einhverjum tímapunkti líkt og flestar aðrar byggingar í Kaupmannahöfn. Ferðin var mjög skemmtileg enda alltaf gaman að
hitta góða vini og ekki má gleyma uppáhalds kaffihúsinu okkar LaGlace sem stendur við Skoubogade 3.

Farnar voru margar ferðir innanlands, til þess að drekka í sig menningu þjóðarinnar og skoða bændur landsins komið var við á Bjarteyjarsandi sem er eitt best varðveitta leyndarmál hér í grennd við höfuðborgina. Ákaflega skemmtilegur staður fyrir fjölskyldur þar sem börn á öllum aldri geta notið þess að vera í sveitasælunni á
fallegum stað.

Aðrir staðir sem við komum við á voru Hreðavatn, Smáralind, Húsafell,
Vestmannaeyjar, Svínadalur, Kringlan og Brynjudalur svo eitthvað
sé nú nefnt. Síðasti viðkomustaðurinn á ferðalagi fjölskyldunnar var Brynjudalur en þar
hefur fjölskyldan farið ásamt Júlla og Svölu undandarin ár og sótt sér jólatré. Þetta er án efa ein skemmtilegasta vina og jólahefð sem við höfum. Þegar komið er í
dalinn hefst leiti að hinu eina sanna jólatré og vitanlega höfum við ávallt náð í
fallegasta tréið í skóginum. Það hafa vissulega komið upp smávægileg slys hvað
fegurðina já og stærðina en fegurðin kemur innanfrá svo stilkurinn hlýtur að vera
ákaflega fallegur!

Það má með sanni segja að námsmenn búi á heimilinu því Emma Brá stundar nám í
leikskólanum Maríuborg, Hafdís Hrönn er í Sæmundarskóla og Kata er orðinn virðulegur NÁMSMAÐUR í Háskólanum í Reykjavík þar sem hún lærir allt um mannauðsstjórnun. Spurningin er því hvort hún verði kominn með FIMM háskólagráður áður en við vitum af.

Hafdís Hrönn er að verða aðal frammarinn á heimilinu, æfir bæði hand- og fótbolta
með FRAM og hefur tekið miklum framförum á árinu. Við höfum því farið á ófá mótin í ár okkur öllum til mikillar gleði. Það verður ekki langur tími sem mun líða áður en Hafdís nær að smita með gleði sinni systur sína Emmu Brá og fær hana til þess að byrja æfa hjá FRAM einnig.

Nú Guði sé lof fyrir gleðilegt ár
og góðar og frjósamar tíðir,
og Guði sé lof, því að grædd urðu sár,
og Guði sé lof, því að dögg urðu tár.
Allt breyttist í blessun um síðir.

Ó, gef þú oss, Drottinn, enn gleðilegt ár
og góðar og blessaðar tíðir,
gef himneska dögg gegnum harmanna tár,
gef himneskan frið fyrir lausnarans sár
og eilífan unað um síðir.

Við færum þér og þínum okkar bestu óskir um gleðilega jólahátíð um leið og við þökkum þér
fyrir samveruna á árinu sem senn er nú líðið. Megi Drottinn Guð færa ykkur hamingju, gleði
og styrk sem og varðveita ykkur um ókomin ár.

Með jólakveðju 

Óttarr

 

Hver greiðir svo KPMG fyrir ónothæfa tveggja mánaða úttekt?

Ég get einfaldlega ekki orða bundist eftir viðtal sem sýnt var í Kastljós fyrr í kvöld við Björgvin G. Sigurðsson, viðskiptaráðherra.

Það er alveg orðið ljóst að skipta þarf ráðherranum út og það hið fyrsta. 

Hann er vanhæfur með öllu.  Nú þegar rætt hefur verið við hann og tvo aðstoðarmenn hans þá hafa verið kynntar til sögunnar þrjár mismunandi útgáfur af sömu sögu KMPG og Glitnis. 

Ráðherrann vissi eða vissi ekki, ráðherrann sá en las ekki eða ráðherranum þótti ekki ástæða til þess að ráðfæra sig um málið við starfsmenn ráðuneytisins.  Er ráðherra bankamála landsins ekki ljóst hvert hlutverk KPMG var í þessari skoðun á gamla Glitni fyrir skilanefnd bankans? 

Það var fleira sem viðskiptaráðherra sagði í viðtalinu sem ég tel að fréttamaðurinn hefði átt að spyrja betur út í og það er þáttur formanns stjórnar fjármálaeftirlitsins, Jón Sigurðsson.  Nú þegar fjármálaeftirlitið hefur enn og aftur vanrækt skyldu sína til eftirlits þá, að sögn viðskiptaráðherra, eiga þeir að fara yfir það hvers vegna KPMG var ráðið til starfsins.  Hefði ekki verið nær að þeir hefðu gert það áður en endurskoðendafyrirtækin hófu skoðun hvert á sínum banka og ég spyr hvernig gátu svona stór hagsmunatengsl farið framhjá Fjármálaeftirlitinu? 

Reyndar hefðu stjórnendur KPMG aldrei átt að taka þetta starf að sér því þeir vita eðlilega um þessi hagsmunartengsl og hvernig slíkt getur stofna rannsókn sem þessari í hættu.   Til þess að halda því til haga þá er ég síður en svo að álíkta um vinnubrögð starfsmanna KPMG og hef enga ástæðu til annars en að ætla að þau hafi verið unnin af heilum hug.

Ég spyr nú hver greiðir fyrir tveggja mánaða vinnu við gerð ónothæfrar skýrslu sem án efa hefur kostað milljónir?

Það er orðið brýnt að fréttamenn kalli til sín stjórnarformann Fjármálaeftirlitsins og varaformann bankaráðs Seðlabanka Íslands sem er einn og sami maðurinn, Jón Sigurðsson.  Hann þarf að svara spurningum fréttamanna og landsmanna um vanrækslu Fjármálaeftirlitsins í aðdraganda bankahrunsins og ekki síður vanrækslu sem hefur verið að koma í ljós síðustu daga m.a vegna KPMG, einnig þarf hann að skýra út meint samskiptaleysi á milli Fjármálaeftirlitsins og Seðlabanka Íslands, sérstaklega í ljósi þess að hann sjálfur gegnir því hlutverki að miðla upplýsingum á milli þessara tveggja stofnanna.

Það er orðið ljóst að Björgvin G. Sigurðsson, viðskiptaráðherra er ekki lengur stætt á að sitja í stól viðskiptaráðherra.

 

Spurningin er þá hvort hann sé í raun og veru ekki dragbítur?

Nei, þessu trúi ég einfaldlega ekki, að Björgvin G. Sigurðsson, viðskiptaráðherra, hafi ekki haft vitneskju um að KPMG hafi verið beiðið um að sinna því veigamikla verkefni sem skilanefnd gamla Glitnis óskaði eftir að þeir inntu af hendi.

Þessu trúi ég einfaldlega ekki.  Það er þrennt sem kemur til greina að mínu mati, ráðherrann hefur kosið að fara með rangt mál til þess að forðast óþægilegra spurninga, í ráðuneytinu er upplýsingagjöf til ráðherra í molum eða ráðherrann sjálfur er ekki starfi sínu vaxinn.

Undanfarnar vikur hefur ráðherrann upplýst hve í raun hann er vanhæfur í starf ráðherra.  Komið hefur í ljós að hann var ekki með upplýsingar á hreinu þegar bankahrunið varð, hann virtist ekki vera með á hreinu hver staðan var þegar bankahrunið átti sér stað, hann er ekki með á hreinu hvernig verið er að vinna úr málefnum bankanna, hann virðist ekki vera í beinu sambandi fjármálaeftirlitið, Seðlabankann né aðra.

Maður hlýtur að setja spurningamerki við störf ráðherrans þar sem hann virðist vera svo illa inni í þjóðfélagsmálum eins og raun ber vitni.  Sú staða sem uppi er í þjóðfélaginu er grafalvarleg og er ég þess fullviss að flestir ráðherrar ríkisstjórnarinnar vinna hörðum höndum við lausn mála og þess vegna hlýtur það að teljast afar óheppilegt að viðskiptaráðherra skuli ekki vera betur að sér í þessum málum, spurningin er þá hvort hann sé í raun og veru ekki dragbítur á það starf sem ríkisstjórnin er annars að vinna.

Björgvin vissi ekki um KPMG fyrr en í gær