"Klassískur" atvinnumótmælandi

Það er alveg ótrúlega mikið gert úr þessu, þe. að þessi einstaklingur hafi fyrst verið handtekinn og nú að honum hafi verið sleppt.  Það getur nú ekki þótt merkilegt að flagga saklausum fána á alþingishúsinu og ekki þykir nú þessi einstaklingur merkilegur fyrir það eitt að hafa flaggað honum. 

Miðað við fréttirnar er þessi aðili einn af þessum "klassísku" atvinnumótmælendum sem virðast ekki hafa neitt fyrir stafni annað en að mótmæla og virðist í raun eini tilgangur hans vera að komast í fréttirnar.  Sem honum hefur svo sannarlega tekist núna að gera.

 

 

 

Fanganum sleppt

Með eindæmum klár

Alveg er hann Steingrímur J. með eindæmum klár maður.  Hann virðist vita allar lausnir og allt sem gerist eftir að á hólminn er komið.  Enn merkilegra er nú hvað fjölmiðlar virðast gleypa endalaust við frá manninum.  Hann hefur verið að gaspra um hversu slæmar allar ákvarðanir sem teknar hafa verið undanfarinn mánuð eru og jafnframt fylgir yfir leitt að hann hafi einmitt óttast að svona færi.

Ég hef nú nokkrum sinnum skrifað um þennan annars ágæta flokk, Vinstri græna, en getuleysi þeirra virðist vera algjört því eins og oft áður koma þeir aldrei með lausnir heldur eingöngu gagnrýni á það sem liðið er.  Enda myndu líklega margir reka upp stór augu ef formaður þess flokks tæki nú uppá því að verða jákvæður og boðberi einhverra lausna.

 

Vond tilfinning fyrir þessu

Það er merkilegt eitt og sér

Það vekur óneitanlega upp spurningar þegar áskorun sem þessi er send út til fjölmiðla.  Getur veri að sögusagnir um rótleysi og valdabaráttu innan flokksins eigi við rök að styðjast?

Það er merkilegt eitt og sér að stjórn Samfylkingarfélagsins í Reykjavík skuli vilja skorast undan þeirri miklu ábyrgð sem hvílir á ríkisstjórn landsins, sem vissulega Samfylkingin er aðili að, nú þegar sjaldan eða aldrei liggur eins mikið við að stjórnarflokkarnir stýri þjóðinni út úr þeim miklu hremmingum sem dunið hafa yfir heimili og fyrirtæki í landinu. 

Eins einkennilegt og það nú hljómar þá virðast tveir flokkar vera þess fullvissir að sama niðurstaða og hefur verið að koma fram í skoðanakönnunum muni líta dagsins ljós ef kosið yrði nú til alþingis, Samfylking og Vinstri grænir.

Það skyldi þó aldrei vera að ákveðnir einstaklingar innan raða Samfylkingarinnar vildu knýja fram breytingar á forystu flokksins sérstaklega þegar bæði formaður og varaformaður flokksins hafa ekki látið til sín taka á þessum erfiðu tímum, Ingibjörg hefur því miður verið fjarverandi vegna veikinda en Ágúst hefur hinsvegar ekki átt uppá pallborðið þar sem honum virðist skorta það traust sem þarf til.  Það hefur ítrekað verið gengið framhjá honum og menn eru farnir að tala ansi hátt um að Björgvin G og Dagur B. eigi að fá stærri sess nú en áður.  Með því að kjósa þarf að stilla upp lista og vissulega opnar það möguleika á endurröðun innan flokksins.

Vinstri grænir vilja vissulega kosningar þar sem þeir eru í stjórnarandstöðu og hafa engu að tapa, ef þeirra fylgi mun aukast í kosningum þá finnst þeim það gott nú ef ekki þá eru þeir einfaldlega á sama stað og þeir eru í dag, hugsanlega má kalla það góða og gilda ástæðu, eða hvað?

Það er vissulega margt sem þarf að endurmeta í mínum flokk þ.m.t. verður að taka umræður um Evrópumálin bæði um aðildarviðræður sem og upptöku nýs gjaldmiðils.  Þessi mál þarf að ræða á faglegum grundvelli á yfirvegaðan hátt.  Þjóðin þarf ekki á að halda skyndiákvörðunum líkt og t.d varaformaður Samfylkingarinnar hefur verið að kalla eftir og sást glöggt í Silfri Egils fyrr í dag.

Vinstri grænir sem og margir aðrir hafa haldið uppi þeirri umræðu að ekkert sé að gerast og mótmæla eigi aðgerðaleysinu.  Þegar það sanna er að menn eru að vinna allan sólahringinn til þess að finna lausn á málunum.  Það sást vel á þeim góða aðgerðapakka sem ríkistjórnin hefur nú kynnt fyrir þjóðinni, hann má sjá á heimasíðu stjórnarráðsins.

Eins og ég hef reyndar sagt áður og mun eflaust segja aftur, ég treysti fáum ef nokkrum betur til þess að gegna starfi forsætisráðherra en einmitt Geir H. Haarde. 

Vilja kosningar í upphafi nýs árs

Sameina tvo ríkisbanka og selja einn strax.

Mín skoðun er sú að koma þarf ríkisbönkunum úr höndum ríkisins eins fljótt og kostur er og til þess eru margar leiðir.  Það er afar jákvætt að þessir erlendu aðilar séu reiðubúnir til þess að skoða þann möguleika að koma að íslenskum bankarekstri beint. 

Ég tel að skoða þurfi alvarlega að sameina tvo ríkisbanka og bjóða erlendum bankastofnunum að kaupa hlut í þriðja bankanum á móti íslenskum lífeyrissjóðum og almenning,  reyndar væri möguleiki að bjóða erlendum aðilum bankann til kaups að fullu og tryggja þannig samkeppni á íslenskum bankamarkaði aftur.  Þetta er breyting sem ég tel að þurfi að gerast eins fljótt og kostur er enda afar óeðilegt að ríkið sé í bankarekstri til lengri tíma litið.

Reyndar væri það áhyggjuefni ef erlendur banki ætti veð í fiskikvóta landsins og raunhæfa möguleika á að eignast kvóta og hugsanlega opnað fyrir það að selja kvótann úr landi.  En væntanlega er það ekki vandamál í huga þeirra sem kalla nú á að ríkið fari í viðræður um inngöngu landsins Evrópubandalagið.  Það er reyndar hægt að leysa þetta með því að flytja þau lán sem snúa að þeim lánum sem eru með veð í kvótanum í hinn sameinaða ríkisbanka sem áfram verður í eigu íslenskra aðila.

Því fyrr sem erlendir aðilar koma að íslenskum bankarekstri því betra, spurningin er bara með hvaða hætti þeir koma að rekstrinum.

 

Erlendir vilja eiga banka

Ekkert annað en aumingjaskapur

Ég skal fyrstu manna fagna öllum þeim sem mótmæla til þess að láta skoðun sína í ljós, enda hef ég alltaf stutt frelsi einstaklingsins í hverju því sem hann tekur sér fyrir hendur þ.m.t að mótmæla þegar hann telur á sér brotið eða þegar hann er ekki sammála því sem er að gerast í kringum hann. 

Þegar ég las að hópur einstaklinga hafi ákveðið að færa þessi mótmæli í gær á lægra plan þá datt mér fyrst í hug að Lára Ómarsdóttir hafi verið á staðnum til þess að sjá til þess að fréttir af viðburðinum yrði meira "krassandi" í fréttaflutningnum líkt og gerðist við Rauðavatn hér fyrir nokkrum mánuðum síðan.

Áttar þetta fólk sig ekki á því að það erum við öll sem þurfum að greiða fyrir lagfæringar og þrif eftir þessa "háttsemi"?  En hvað stendur í raun og veru uppi eftir gærdaginn, eru það þessir einstaklingar sem ákveða að skemma eða óhreinka eigur okkar eða það að hátt í sex þúsund manns hafi komið saman á Austurvelli til þess að mótmæla að þeirra sögn aðgerðaleysi ríkisstjórnarinnar?

 

Þinghúsið þrifið

Sýndarmennska

Alveg ótrúleg leikflétta hjá N1 sem undanfarin ár hefur verið leiðandi í verðhækkunum og ef mér skjálast ekki þá voru þeir einmitt fyrstir nú í vikunni að hækka eldsneytið hjá sér.  En líklega hafa þeir þurft að hækka til þess að geta sýnt fram á þennan leikaraskap að gefa nú 10 króna afslátt af eldsneyti í dag, ekki gátu þeir hugsað sér að lækka framlegð sína einn dag.  En það verður kannski ekki skafið af þeim að þetta er nokkuð sniðug aðferð þ.e að hækka um nokkrar krónur og gefa svo afslátt nokkrum dögum seinna, þá allavega lýtur það þannig út að þeir séu að gefa eftir af sinni köku.

En líklega verður það seint sagt að N1 verði ekki fyrst til þess að hækka og allra síðast til þess að lækka!

Eldsneytisverð víða lækkað í dag

Spyr sá sem ekki veit

Sagt er í frétt af fundinum

"Fundurinn samþykkti einnig tillögu þess efnis að hafi verði vinna við reglur um setu fulltrúa VR í stjórnum og siðareglur þeirra"

Það sem vantar hinsvegar er hver á að vinna þessa vinnu, er það trúnaðarráðið eða verður skipaður sérstakur vinnuhópur fyrir verkið?

- Spyr sá sem ekki veit.

VR flýtir stjórnarkjöri

Hvers vegna lokaður fundur?

 

Af hverju var fjölmiðlum ekki leyft að vera á fundinum?  Sérstaklega í ljósi þess að félagsmenn VR eru staðsettir um allt land og margir sem höfðu ekki tækifæri á því að komast á fundinn.  Það hefði verið möguleiki að streyma fundinum á lokuðu svæði á heimasíðu VR ef mönnum var svona illa við að fjölmiðlar væru viðstaddir.

Ég ætla svo sem ekki að segja hvort formaðurinn hefði átt að segja af sér eða ekki, það er nokkuð sem hann verðu að gera upp með sjálfum sér. 

Hinsvegar held ég að hann geti sem f.v. stjórnarmaður í Kaupþing fært rök bæði með og á móti þeirri ákvörðun sem tekinn var á sínum tíma.  Einnig tel ég að hægt sé að færa rök fyrir því að formaður VR sitji í stjórnum fyrirtækja þar sem lífeyrissjóður félagsins hefur lagt mikla fjármuni til, það hlýtur að vera starf formanns að gæta hagsmuna félagsmanna eins og kostur er. 

Hinsvegar er spurning hvort formaðurinn hefði átt að þiggja aukalegar greiðslur fyrir stjórnasetuna, spurningin er kannski sú hvort þær greiðslur sem greiddar væru fyrir stjórnarsetu hefðu ekki átt að renna beint til félagsins.

En það sem ég tel hinsvegar að formaðurinn ætti að skoða alvarlega er að endurskoða laun sín í samráði við stjórn félagsins.  Eru það eðlileg laun að formaður verkalýðsfélags sé með hátt í tvær milljónir á mánuði?  Hvað ætli þurfi marga félagsmenn til þess að greiða launin sem koma bara frá félaginu, ætli það séu ekki þrjú til fjögur hundrum félagsmenn sem þurfa að greiða félagsgjöld sín til þess að félagið eigi fyrir launum formannsins. 

Það verður áhugavert að fylgjast með þeim hagræðingaraðgerðum sem formaður félagsins tekur fyrir til þess að ná niður rekstrarkostnaði félagsins, sem verður að teljast í hærri kantinum miðað við uppgefnar upplýsingar síðustu ár.

Afsagnar formanns ekki krafist

Er Framsóknarflokkurinn rotinn að innan?

Það voru stór mistök sem fv. alþingismaðurinn Bjarni Harðarson gerði í gærkvöldi.  Það var ekki einungis sú ákvörðun hans að óska eftir því við aðstoðarmann sinn að senda umrætt bréf til fjölmiðla heldur  í raun eru stóru mistökin þau að óska eftir því við aðstoðarmann sinn að falsa sendinguna til fjölmiðla,  með það að markmiðið að bréfið kæmist "nafnlaust" til fjölmiðla.

Vel má vera að metnaður fv. þingmannsins hafi rekið hann út í þessar ógöngur en maður hlýtur að spyrja sig þeirrar spurningar hvort þingflokkur Framsóknarflokksins sé í raun og veru starfshæfur eftir allt sem á undan er gengið.  Það er líklega orða sönnu sem amma mín sáluga sagði einu sinni  "versti óvinur framsóknarmanna eru framsóknarmennirnir sjálfir". 

Á undanförnu ári hafa stærstu áföll flokksins verið afleiðing þess sem gerist innan hans, líklega er þessi ágæti flokkur að verða rotinn að innan, þó svo ég ætli ekki að fullyrða neitt um það.  En eitt er víst að það bíður formanns flokksins erfitt verkefni að reyna byggja flokkinn upp bæði innra sem og ytra starf hans.  Það verður reyndar að teljast ólíklegt að honum takist það erfiða verkefni og rík krafa félagsmanna um formannsskipti hljóta að vera orðnar háværari með hverjum deginum.

Fékk aðeins í magann

Engu líkara en það væri verið að opna nýja raftækjaverslun

Íslendingar er auðvitað alveg hreint stórkostlegir.  Ég átti leið framhjá áfengisversluninni í dag og það var engu líkara en þetta væri síðasti opnunardagur verslunarinnar nú eða hugsanlega var áfengisverslunin búinn að opna nýjan raftækjamarkað í verslunum sínum, slík var örtröðin.

Ég fór að velta þessu fyrir mér hvort þetta gætu verið skýringarnar, en svo var auðvitað ekki heldur var hinn sanni íslendingur að fara að ráðleggingum Baugsmanna um að hver og einn ætti að hamstra matvæli og aðrar nauðsynjar og svo ekki sé nú talað um búbótina að byrja hamstra áður en 5,25% hækkun myndi skella á.

Svona til gamans þá hækkar t.d rauðvín sem við kaupum oft um heilar 68 krónur og það er nú alveg þess virði að birgja sig upp fyrir þá upphæð, eða hvað?

Örtröð í verslunum ÁTVR