Eru þeir að fá alla á móti sér?

Nú held ég að það sé kominn tími til þess að trukkahópurinn ráði sér almannatengil (pr. mann) sem gætir hagsmuna þeirra í fjölmiðlum.  Því klárlega eru að koma röng skilaboð frá hópnum og stundum misvísandi, fer svolítið eftir því við hvern er talað hjá þeim, þó svo megin línan sé sú sama.  Það er bara ekki nóg, kröfurnar þurfa að vera kristal skýrar og skilaboðin sömuleiðis.

Það er ég fullviss um að þau skilaboð sem berast úr herbúðum hópsins í gær og dag, hótanir sem þessar "Menn vilja fá svör og svo verður séð til hvað verður gert. Það fer eftir því hvernig svörin verða,“ fara illa bæði í almenning sem og stjórnvöld enda er erfitt að semja við þá sem fara fram með hótanir.

Þeir ættu frekar að tala um að það verði aðgerðir hvort sem þær ganga undir nafninu "Stóra stopp" eða eitthvað annað, jafnframt ættu þeir að mínu mati að gefa það út að þær verði t.d í næstu viku eða hvenær svo sem þeir vilja hafa þær, en þeir geta hinsvegar alltaf slegið þeim á frest nú eða hreinlega fellt þær niður telja þeir sig vera búnir að ná því fram sem þeir vilja.

Það eru fjölmargir almannatenglar sem hægt er að ráða til starfa og ég tel að þeir ættu að nýta sér þjónustu þeirra, áður en almenningur snýst gegn þeim.  Allavega get ég ekki betur heyrt í kringum mig en að fólk sé ekki eins ánægt með þessar aðgerðir eins og það var áður, reyndar hugsa ég að sá fjöldi sem er orðinn hreinlega á móti þessum aðgerðum hafi margfaldast eftir fréttatíma Stöðvar2 í gær þar sem trukkabílstjórarnir lögðu líf annara í stór hættu þegar þeir komu akandi af afrein inná Ártúnsbrekkuna.

Bílstjórar ræða um „stórt stopp“

Allt í þágu listarinnar

Sumir listamenn geta einfaldlega ekki unnið með fólki og þetta er líklega skýrt dæmi um það.  Af hverju óskaði listamaðurinn ekki eftir leyfi framkvæmdastjóra kirkjunnar, ég er viss um að það hefði fengist þrátt fyrir að þarna hafi verið birtar heimspekilegar spurningar um kristna trú og tilvist hennar.  Hinsvegar finnst mér að þetta sé skemmtilegt athæfi sem getur breytt hversdagsleikanum og mætti alveg vera meira af þ.e að nýta byggingar til þess að varpa á listaverkum eða einfaldlega breyta lýsingum en vitaskuld ætti það allt að gerast í samráði við húsráðendur.

Myndasýning í leyfisleysi

Jákvæðar fréttir

Það berast jákvæðar fréttir frá BUGL og líklega er langt síðan eins góðar fréttir hafa heyrst þaðan.  Það er ánægjulegt að sjá hve gott starf starfsfólkið á þessum stað er að gera og ekki síður er gott til þess að vita hve öflugur Guðlaugur Þór er sem heilbrigðisráðherra. 

Það er klárlega þörf á breytingum á hinum ýmsu sviðum kerfisins o.þ.t heilbrigðiskerfinu 

"Hlustað hefði verið á tillögur starfsfólks og í ágúst sl. fékkst aukið fjármagn. Í kjölfarið voru ráðnir fjórir nýir starfsmenn auk fræðslustjóra" sagði starfsfólkið hjá BUGL og nú hefur fækkað um 58 aðila á biðistanum sem hlýtur að teljast góður árangur.

 

Biðlistar BUGL hafa styst

Væri ekki óeðlilegt?

Er nokkuð athugavert við það að Sturla talsmaður flutningabílstjórana sé boðaður í skýrslutöku, væri það ekki frekar athugavert ef hann hefði ekki verið boðaður til lögreglunar?

Væri það ekki óeðlilegt ef fólk sem stöðvar umferð á mikilvægum samgönguæðum borgarinnar og tefur með því fólk sem er á sinni leið.  Er það í raun ekki brot á frelsi hvers og eins ef einhver ákveður að stöðvar för hans?

Reyndar ætla ég hvorki að dæma né taka undir mótmæli atvinnubílstjóranna en maður hlýtur að spyrja sig af því hvort þetta sé rétt leið til þess að ná sýnu fram, eða eru kannski aðrar leiðir sem eru áhirfaríkari?

 

 

Sturla boðaður í skýrslutöku

Bein útsending frá Hvannadalshnjúk - Síminn er á toppnum

Síminn prófar nýja langdræga 3G kerfið 

Um síðastliðna helgi gengu nokkrir vaskir starfsmenn Símans og Sensa upp á Hvannadalshnjúk með það að markmiði að prófa sambandið við nýja 3G senda sem búið er að setja upp á Háöxl rétt undir Vatnajökli og Háfelli sem er rétt austan Víkur í Mýrdal. Gangan gekk vel í blíðskaparveðri og á ýmsum stöðum á leiðinni var staldrað við og hringt í fjölskyldumeðlimi sem fylgdust með göngunni sem var í beinni útsendingu á internetinu í gegnum 3G netkort í fartölvu.

Þegar upp á Hvannadalshnjúkinn var komið gátu starfsmenn Símans með einföldum hætti sýnt þeim sem heima sátu frábært útsýni af Hvannadalshnjúk og hvernig þar var umhorfs.  Gott símasamband var alla leiðina upp á toppinn og gátu göngumenn hringt heim og látið vita af ferðum sínum.

Þetta er í fyrsta skiptið sem bein útsending er send frá hæsta punkti landsins en næsti langdrægi 3G sendir var í 125 km fjarlægð frá göngumönnum. Yfir 60 starfsmenn frá Skiptum og dótturfélögum hyggjast ganga á Hvannadalshnjúksíðustu helgina í apríl og ljóst þykir að menn munu þá verða í góðu talsíma og netsambandi við vini, samstarfsmenn og fjölskyldumeðlimi sem heima sitja.

Ég veit ekki með ykkur....

....en ekki langar mig að búa með sveppum.  Ég held að rekstrar aðilar húsnæðisins ættu einfaldlega að taka sig til í andlitinu og láta laga þetta.  Reyndar finnst mér að heilbrigðisyfirvöld ættu að vera búin að blanda sér í málið enda afar óeðlilegt að verið sé að leigja út íbúðarhúsnæði sem í er sveppagróður sama hvort hann sé heilsuspillandi eða ekki.

Segja sveppinn ekki hættulegan

Beiðið við Hnjúkinn

Hér sit ég við rætur Sandfells í blíðskapar veðri, glaða sólskin og logn en líklega er um tveggja stiga frost.  Útsýnið er stórbrotið þegar maður lítur upp til Hvannadalshnjúks þar sem félagar mínir eru að ganga upp, líklega að komast uppá hátindinn um þessar mundir.  Við komum hingað um miðnætti og þeir gengu af stað um klukkan eitt.  Það er frábært hve gott veður þeir hafa fengið til þess að klifra uppá hæsta tind landsins. 

En á meðan ég bíð eftir þeim hef ég rölt hér um svæðið, gengið upp í hlíðar Sandfell en ég læt Hnjúkinn bíða að sinni, eigum við ekki að segja að það getur verið skemmtilegt að geyma stærri áskoranir í það minnsta þar til maður kemst í betra form.

En það verða án efa þreyttir og hugsanlega sólbrenndir göngugarpar sem koma niður hlíðarnar um klukkan tvö í dag og líklega verður ekki mikið sagt á leiðinni í bæinn nema þá einna helst með sönghrotum

Nú stendur hnífurinn í kúnni...

...voru orð sem Bessi Bjarnason notaði í leikþættinum "með Jónasi og fjölskyldu" á sínum tíma, reyndar sagði hann einnig, "vegamálastjóri hjálpi mér", þegar ég sat fastur í dag á eftir trukkunum sem höfðu lokað götunni þá gat ég ekki annað en hugsað um þennan leikþátt og vitaskuld kom hann mér til þess að brosa út í annað.

En eins og einhversstaðar stendur "Síminn - lætur það gerast" þá tók ég einfaldlega upp fartölvuna, setti 3G kortið frá Símanum í samband og fór að skoða netið, er hægt að hafa það betra!

Eitt er víst á meðan þetta ástand varir þá fer maður ekki á ferðina nema taka fartölvuna og 3G kortið frá Símanum með, því þá mega þeir loka götunum mín vegna í þrjár klukkustundir í senn.  Því það er sá tími sem batteríið í vélinni endist. 

Fyrir þá sem enn eiga eftir að ná sér í 3G netkort hjá Símanum geta skoðað það hér

Kringlumýrarbraut opnuð á ný